ياصاحبي جيتك أشكي لك من أحوالـي
جيت وما دامك رفيقي ليه اطولها
العلم ومافيـه يـا أول وآخـر أمالـي
عندي رساله ولا أدري كيف أوصلهـا
للي سبتنـي وانـا مـن قبلهـا سالـي
أبيـك توقـف معـي وتـروح تسألهـا
وش فيها تفتـح علـي أبـواب عذالـي
وتحمّـل النفـس حاجـه مـا تحمّلهـا
وش فيها رغم الوفـا تتركنـي لحالـي
وأنا لجفاها تركـت الدنيـا بأكملهـا
إن كان هذا زعـل علمّهـا يالغالـي
ماكان قصـدي ورب البيـت ازعلهـا
علمّها واللـي يخلـي قلبـك الخالـي
عن ضيقتي وين وصلت من تجاهلها
علمّها كم لـي وانـا ماشلـت جوالـي
كلـه علشـان مـا أقلّـب رسايلـهـا
وعلمها وشلون لا مـرت علـى بالـي
أروح وأضـم مخدتي واقبّلـهـا
وعلمها كيف أنشغل عن كثرة أشغالـي
وأسرح وأغمـض عيونـي واتخيلهـا
علمها عني .. وعن همي .وغربالـي
علمها عن كـل حاجـه فـي تجهلهـا
وإن شفتها دنّقت .. تبكي علـى حالـي
إنسى الكلام وتذّكّـر كلمـه و قلهـا
قل : شاعرك يعتذر .. ويعاهدك تالي ..
إنـه يرتـب حساباتـه مـن أولـهـا
ويقول : حتى القصيد اللي على بالـي
والله مـا عـاد أكتبـه كانـه يزعلهـا
السبت أبريل 26, 2008 10:44 pm
